Mohamudgara Bhaja Govindam

bhaja gōviṃdaṃ bhaja gōviṃdaṃ gōviṃdaṃ bhaja mūḍhamatē | saṃprāptē sannihitē kālē na hi na hi rakṣati ḍukṛñ karaṇē || 1 || mūḍha jahīhi dhanāgamatṛṣṇāṃ kuru sadbuddhiṃ manasi vitṛṣṇām | yallabhasē nijakarmōpāttaṃ vittaṃ tēna vinōdaya cittam || 2 || nārīstanabharanābhīdēśaṃ dṛṣṭvā mā gā mōhāvēśam | ētanmāṃsavasādivikāraṃ manasi viciṃtaya vāraṃ vāram || 3 || nalinīdaḷagatajalamatitaraḷaṃ tadvajjīvitamatiśayacapalam | viddhi vyādhyabhimānagrastaṃ lōkaṃ śōkahataṃ ca samastam || 4 || yāvadvittōpārjanasakta- -stāvannijaparivārō raktaḥ | paścājjīvati jarjaradēhē vārtāṃ kō’pi na pṛcchati gēhē || 5 || yāvatpavanō nivasati dēhē tāvatpṛcchati kuśalaṃ gēhē | gatavati vāyau dēhāpāyē bhāryā bibhyati tasminkāyē || 6 || bālastāvatkrīḍāsakta- -staruṇastāvattaruṇīsaktaḥ | vṛddhastāvacciṃtāsaktaḥ parē brahmaṇi kō’pi na saktaḥ || 7 || kā tē kāṃtā kastē putraḥ saṃsārō’yamatīva vicitraḥ | kasya tvaṃ kaḥ kuta āyāta- -stattvaṃ ciṃtaya yadidaṃ bhrāṃtaḥ || 8 || satsaṃgatvē niḥsaṃgatvaṃ niḥsaṃgatvē nirmōhatvam | nirmōhatvē niścalatattvaṃ niścalatattvē jīvanmuktiḥ || 9 || vayasi gatē kaḥ kāmavikāraḥ śuṣkē nīrē kaḥ kāsāraḥ | kṣīṇē vittē kaḥ parivārō jñātē tattvē kaḥ saṃsāraḥ || 10 || mā kuru dhanajanayauvanagarvaṃ harati nimēṣātkālaḥ sarvam | māyāmayamidamakhilaṃ hitvā brahmapadaṃ tvaṃ praviśa viditvā || 11 || dinayāminyau sāyaṃ prātaḥ śiśiravasaṃtau punarāyātaḥ | kālaḥ krīḍati gacchatyāyu- -stadapi na muṃcatyāśāvāyuḥ || 12 || kā tē kāṃtādhanagataciṃtā vātula kiṃ tava nāsti niyaṃtā | trijagati sajjanasaṃgatirēkā bhavati bhavārṇavataraṇē naukā || 13 || jaṭilī muṃḍī luṃcitakēśaḥ kāṣāyāṃbarabahukṛtavēṣaḥ | paśyannapi ca na paśyati mūḍhō hyudaranimittaṃ bahukṛtavēṣaḥ || 14 || aṃgaṃ galitaṃ palitaṃ muṃḍaṃ daśanavihīnaṃ jātaṃ tuṃḍam | vṛddhō yāti gṛhītvā daṃḍaṃ tadapi na muṃcatyāśāpiṃḍam || 15 || agrē vahniḥ pṛṣṭhē bhānū rātrau cubukasamarpitajānuḥ | karatalabhikṣastarutalavāsa- -stadapi na muṃcatyāśāpāśaḥ || 16 || kurutē gaṃgāsāgaragamanaṃ vrataparipālanamathavā dānam | jñānavihinaḥ sarvamatēna muktiṃ na bhajati janmaśatēna || 17 || suramaṃdiratarumūlanivāsaḥ śayyā bhūtalamajinaṃ vāsaḥ | sarvaparigrahabhōgatyāgaḥ kasya sukhaṃ na karōti virāgaḥ || 18 || yōgaratō vā bhōgaratō vā saṃgaratō vā saṃgavīhinaḥ | yasya brahmaṇi ramatē cittaṃ naṃdati naṃdati naṃdatyēva || 19 || bhagavadgītā kiṃcidadhītā gaṃgājalalavakaṇikā pītā | sakṛdapi yēna murārisamarcā kriyatē tasya yamēna na carcā || 20 || punarapi jananaṃ punarapi maraṇaṃ punarapi jananījaṭharē śayanam | iha saṃsārē bahudustārē kṛpayāpārē pāhi murārē || 21 || rathyākarpaṭaviracitakaṃthaḥ puṇyāpuṇyavivarjitapaṃthaḥ | yōgī yōganiyōjitacittō ramatē bālōnmattavadēva || 22 || kastvaṃ kō’haṃ kuta āyātaḥ kā mē jananī kō mē tātaḥ | iti paribhāvaya sarvamasāraṃ viśvaṃ tyaktvā svapnavicāram || 23 || tvayi mayi cānyatraikō viṣṇu- -rvyarthaṃ kupyasi mayyasahiṣṇuḥ | sarvasminnapi paśyātmānaṃ sarvatrōtsṛja bhēdājñānam || 24 || śatrau mitrē putrē baṃdhau mā kuru yatnaṃ vigrahasaṃdhau | bhava samacittaḥ sarvatra tvaṃ vāṃchasyacirādyadi viṣṇutvam || 25 || kāmaṃ krōdhaṃ lōbhaṃ mōhaṃ tyaktvātmānaṃ bhāvaya kō’ham | ātmajñānavihīnā mūḍhā- -stē pacyaṃtē narakanigūḍhāḥ || 26 || gēyaṃ gītānāmasahasraṃ dhyēyaṃ śrīpatirūpamajasram | nēyaṃ sajjanasaṃgē cittaṃ dēyaṃ dīnajanāya ca vittam || 27 || sukhataḥ kriyatē rāmābhōgaḥ paścāddhaṃta śarīrē rōgaḥ | yadyapi lōkē maraṇaṃ śaraṇaṃ tadapi na muṃcati pāpācaraṇam || 28 || arthamanarthaṃ bhāvaya nityaṃ nāsti tataḥ sukhalēśaḥ satyam | putrādapi dhanabhājāṃ bhītiḥ sarvatraiṣā vihitā rītiḥ || 29 || prāṇāyāmaṃ pratyāhāraṃ nityānityavivēkavicāram | jāpyasamētasamādhividhānaṃ kurvavadhānaṃ mahadavadhānam || 30 || gurucaraṇāṃbujanirbharabhaktaḥ saṃsārādacirādbhava muktaḥ | sēṃdriyamānasaniyamādēva drakṣyasi nijahṛdayasthaṃ dēvam || 31 || iti śrīmatparamahaṃsaparivrājakācāryasya śrīgōviṃdabhagavatpūjyapādaśiṣyasya śrīmacchaṃkarabhagavataḥ kṛtau mōhamudgaraḥ saṃpūrṇam |

భజ గోవిందం భజ గోవిందం గోవిందం భజ మూఢమతే | సంప్రాప్తే సన్నిహితే కాలే న హి న హి రక్షతి డుకృఞ్ కరణే || ౧ || మూఢ జహీహి ధనాగమతృష్ణాం కురు సద్బుద్ధిం మనసి వితృష్ణామ్ | యల్లభసే నిజకర్మోపాత్తం విత్తం తేన వినోదయ చిత్తమ్ || ౨ || నారీస్తనభరనాభీదేశం దృష్ట్వా మా గా మోహావేశమ్ | ఏతన్మాంసవసాదివికారం మనసి విచింతయ వారం వారమ్ || ౩ || నలినీదళగతజలమతితరళం తద్వజ్జీవితమతిశయచపలమ్ | విద్ధి వ్యాధ్యభిమానగ్రస్తం లోకం శోకహతం చ సమస్తమ్ || ౪ || యావద్విత్తోపార్జనసక్త- -స్తావన్నిజపరివారో రక్తః | పశ్చాజ్జీవతి జర్జరదేహే వార్తాం కోఽపి న పృచ్ఛతి గేహే || ౫ || యావత్పవనో నివసతి దేహే తావత్పృచ్ఛతి కుశలం గేహే | గతవతి వాయౌ దేహాపాయే భార్యా బిభ్యతి తస్మిన్కాయే || ౬ || బాలస్తావత్క్రీడాసక్త- -స్తరుణస్తావత్తరుణీసక్తః | వృద్ధస్తావచ్చింతాసక్తః పరే బ్రహ్మణి కోఽపి న సక్తః || ౭ || కా తే కాంతా కస్తే పుత్రః సంసారోఽయమతీవ విచిత్రః | కస్య త్వం కః కుత ఆయాత- -స్తత్త్వం చింతయ యదిదం భ్రాంతః || ౮ || సత్సంగత్వే నిఃసంగత్వం నిఃసంగత్వే నిర్మోహత్వమ్ | నిర్మోహత్వే నిశ్చలతత్త్వం నిశ్చలతత్త్వే జీవన్ముక్తిః || ౯ || వయసి గతే కః కామవికారః శుష్కే నీరే కః కాసారః | క్షీణే విత్తే కః పరివారో జ్ఞాతే తత్త్వే కః సంసారః || ౧౦ || మా కురు ధనజనయౌవనగర్వం హరతి నిమేషాత్కాలః సర్వమ్ | మాయామయమిదమఖిలం హిత్వా బ్రహ్మపదం త్వం ప్రవిశ విదిత్వా || ౧౧ || దినయామిన్యౌ సాయం ప్రాతః శిశిరవసంతౌ పునరాయాతః | కాలః క్రీడతి గచ్ఛత్యాయు- -స్తదపి న ముంచత్యాశావాయుః || ౧౨ || కా తే కాంతాధనగతచింతా వాతుల కిం తవ నాస్తి నియంతా | త్రిజగతి సజ్జనసంగతిరేకా భవతి భవార్ణవతరణే నౌకా || ౧౩ || జటిలీ ముండీ లుంచితకేశః కాషాయాంబరబహుకృతవేషః | పశ్యన్నపి చ న పశ్యతి మూఢో హ్యుదరనిమిత్తం బహుకృతవేషః || ౧౪ || అంగం గలితం పలితం ముండం దశనవిహీనం జాతం తుండమ్ | వృద్ధో యాతి గృహీత్వా దండం తదపి న ముంచత్యాశాపిండమ్ || ౧౫ || అగ్రే వహ్నిః పృష్ఠే భానూ రాత్రౌ చుబుకసమర్పితజానుః | కరతలభిక్షస్తరుతలవాస- -స్తదపి న ముంచత్యాశాపాశః || ౧౬ || కురుతే గంగాసాగరగమనం వ్రతపరిపాలనమథవా దానమ్ | జ్ఞానవిహినః సర్వమతేన ముక్తిం న భజతి జన్మశతేన || ౧౭ || సురమందిరతరుమూలనివాసః శయ్యా భూతలమజినం వాసః | సర్వపరిగ్రహభోగత్యాగః కస్య సుఖం న కరోతి విరాగః || ౧౮ || యోగరతో వా భోగరతో వా సంగరతో వా సంగవీహినః | యస్య బ్రహ్మణి రమతే చిత్తం నందతి నందతి నందత్యేవ || ౧౯ || భగవద్గీతా కించిదధీతా గంగాజలలవకణికా పీతా | సకృదపి యేన మురారిసమర్చా క్రియతే తస్య యమేన న చర్చా || ౨౦ || పునరపి జననం పునరపి మరణం పునరపి జననీజఠరే శయనమ్ | ఇహ సంసారే బహుదుస్తారే కృపయాపారే పాహి మురారే || ౨౧ || రథ్యాకర్పటవిరచితకంథః పుణ్యాపుణ్యవివర్జితపంథః | యోగీ యోగనియోజితచిత్తో రమతే బాలోన్మత్తవదేవ || ౨౨ || కస్త్వం కోఽహం కుత ఆయాతః కా మే జననీ కో మే తాతః | ఇతి పరిభావయ సర్వమసారం విశ్వం త్యక్త్వా స్వప్నవిచారమ్ || ౨౩ || త్వయి మయి చాన్యత్రైకో విష్ణు- -ర్వ్యర్థం కుప్యసి మయ్యసహిష్ణుః | సర్వస్మిన్నపి పశ్యాత్మానం సర్వత్రోత్సృజ భేదాజ్ఞానమ్ || ౨౪ || శత్రౌ మిత్రే పుత్రే బంధౌ మా కురు యత్నం విగ్రహసంధౌ | భవ సమచిత్తః సర్వత్ర త్వం వాంఛస్యచిరాద్యది విష్ణుత్వమ్ || ౨౫ || కామం క్రోధం లోభం మోహం త్యక్త్వాత్మానం భావయ కోఽహమ్ | ఆత్మజ్ఞానవిహీనా మూఢా- -స్తే పచ్యంతే నరకనిగూఢాః || ౨౬ || గేయం గీతానామసహస్రం ధ్యేయం శ్రీపతిరూపమజస్రమ్ | నేయం సజ్జనసంగే చిత్తం దేయం దీనజనాయ చ విత్తమ్ || ౨౭ || సుఖతః క్రియతే రామాభోగః పశ్చాద్ధంత శరీరే రోగః | యద్యపి లోకే మరణం శరణం తదపి న ముంచతి పాపాచరణమ్ || ౨౮ || అర్థమనర్థం భావయ నిత్యం నాస్తి తతః సుఖలేశః సత్యమ్ | పుత్రాదపి ధనభాజాం భీతిః సర్వత్రైషా విహితా రీతిః || ౨౯ || ప్రాణాయామం ప్రత్యాహారం నిత్యానిత్యవివేకవిచారమ్ | జాప్యసమేతసమాధివిధానం కుర్వవధానం మహదవధానమ్ || ౩౦ || గురుచరణాంబుజనిర్భరభక్తః సంసారాదచిరాద్భవ ముక్తః | సేంద్రియమానసనియమాదేవ ద్రక్ష్యసి నిజహృదయస్థం దేవమ్ || ౩౧ || ఇతి శ్రీమత్పరమహంసపరివ్రాజకాచార్యస్య శ్రీగోవిందభగవత్పూజ్యపాదశిష్యస్య శ్రీమచ్ఛంకరభగవతః కృతౌ మోహముద్గరః సంపూర్ణమ్ |