Sri Narasimha Kavacham

nṛsiṃhakavacaṃ vakṣyē prahlādēnōditaṃ purā | sarvarakṣākaraṃ puṇyaṃ sarvōpadravanāśanam || 1 || sarvasaṃpatkaraṃ caiva svargamōkṣapradāyakam | dhyātvā nṛsiṃhaṃ dēvēśaṃ hēmasiṃhāsanasthitam || 2 || vivṛtāsyaṃ trinayanaṃ śaradiṃdusamaprabham | lakṣmyāliṃgitavāmāṃgaṃ vibhūtibhirupāśritam || 3 || caturbhujaṃ kōmalāṃgaṃ svarṇakuṃḍalaśōbhitam | sarōjaśōbhitōraskaṃ ratnakēyūramudritam || 4 || taptakāṃcanasaṃkāśaṃ pītanirmalavāsasam | iṃdrādisuramauḷisthasphuranmāṇikyadīptibhiḥ || 5 || virājitapadadvaṃdvaṃ śaṃkhacakrādihētibhiḥ | garutmatā savinayaṃ stūyamānaṃ mudānvitam || 6 || svahṛtkamalasaṃvāsaṃ kṛtvā tu kavacaṃ paṭhēt | nṛsiṃhō mē śiraḥ pātu lōkarakṣātmasaṃbhavaḥ || 7 || sarvagō’pi staṃbhavāsaḥ phālaṃ mē rakṣatu dhvanim | nṛsiṃhō mē dṛśau pātu sōmasūryāgnilōcanaḥ || 8 || smṛtiṃ mē pātu nṛharirmunivaryastutipriyaḥ | nāsāṃ mē siṃhanāsastu mukhaṃ lakṣmīmukhapriyaḥ || 9 || sarvavidyādhipaḥ pātu nṛsiṃhō rasanāṃ mama | vaktraṃ pātviṃduvadanaḥ sadā prahlādavaṃditaḥ || 10 || nṛsiṃhaḥ pātu mē kaṃṭhaṃ skaṃdhau bhūbharaṇāṃtakṛt | divyāstraśōbhitabhujō nṛsiṃhaḥ pātu mē bhujau || 11 || karau mē dēvavaradō nṛsiṃhaḥ pātu sarvataḥ | hṛdayaṃ yōgisādhyaśca nivāsaṃ pātu mē hariḥ || 12 || madhyaṃ pātu hiraṇyākṣavakṣaḥkukṣividāraṇaḥ | nābhiṃ mē pātu nṛhariḥ svanābhibrahmasaṃstutaḥ || 13 || brahmāṃḍakōṭayaḥ kaṭyāṃ yasyāsau pātu mē kaṭim | guhyaṃ mē pātu guhyānāṃ maṃtrāṇāṃ guhyarūpadhṛk || 14 || ūrū manōbhavaḥ pātu jānunī nararūpadhṛk | jaṃghē pātu dharābhārahartā yō’sau nṛkēsarī || 15 || surarājyapradaḥ pātu pādau mē nṛharīśvaraḥ | sahasraśīrṣā puruṣaḥ pātu mē sarvaśastanum || 16 || mahōgraḥ pūrvataḥ pātu mahāvīrāgrajō’gnitaḥ | mahāviṣṇurdakṣiṇē tu mahājvālastu nairṛtau || 17 || paścimē pātu sarvēśō diśi mē sarvatōmukhaḥ | nṛsiṃhaḥ pātu vāyavyāṃ saumyāṃ bhūṣaṇavigrahaḥ || 18 || īśānyāṃ pātu bhadrō mē sarvamaṃgaḷadāyakaḥ | saṃsārabhayadaḥ pātu mṛtyōrmṛtyurnṛkēsarī || 19 || idaṃ nṛsiṃhakavacaṃ prahlādamukhamaṃḍitam | bhaktimānyaḥ paṭhēnnityaṃ sarvapāpaiḥ pramucyatē || 20 || putravān dhanavān lōkē dīrghāyurupajāyatē | yaṃ yaṃ kāmayatē kāmaṃ taṃ taṃ prāpnōtyasaṃśayam || 21 || sarvatra jayamāpnōti sarvatra vijayī bhavēt | bhūmyaṃtarikṣadivyānāṃ grahāṇāṃ vinivāraṇam || 22 || vṛścikōragasaṃbhūtaviṣāpaharaṇaṃ param | brahmarākṣasayakṣāṇāṃ dūrōtsāraṇakāraṇam || 23 || bhūrjē vā tāḷapatrē vā kavacaṃ likhitaṃ śubham | karamūlē dhṛtaṃ yēna sidhyēyuḥ karmasiddhayaḥ || 24 || dēvāsuramanuṣyēṣu svaṃ svamēva jayaṃ labhēt | ēkasaṃdhyaṃ trisaṃdhyaṃ vā yaḥ paṭhēnniyatō naraḥ || 25 || sarvamaṃgaḷamāṃgaḷyaṃ bhuktiṃ muktiṃ ca viṃdati | dvātriṃśacca sahasrāṇi paṭhēcchuddhātmanāṃ nṛṇām || 26 || kavacasyāsya maṃtrasya maṃtrasiddhiḥ prajāyatē | anēna maṃtrarājēna kṛtvā bhasmābhimaṃtraṇam || 27 || tilakaṃ vinyasēdyastu tasya grahabhayaṃ harēt | trivāraṃ japamānastu dattaṃ vāryabhimaṃtrya ca || 28 || prāśayēdyō narō maṃtraṃ nṛsiṃhadhyānamācarēt | tasya rōgāḥ praṇaśyaṃti yē ca syuḥ kukṣisaṃbhavāḥ || 29 || kimatra bahunōktēna nṛsiṃhasadṛśō bhavēt | manasā ciṃtitaṃ yattu sa taccāpnōtyasaṃśayam || 30 || garjaṃtaṃ garjayaṃtaṃ nijabhujapaṭalaṃ sphōṭayaṃtaṃ haṭaṃtaṃ rūpyaṃtaṃ tāpayaṃtaṃ divi bhuvi ditijaṃ kṣēpayaṃtaṃ kṣipaṃtam | kraṃdaṃtaṃ rōṣayaṃtaṃ diśi diśi satataṃ saṃharaṃtaṃ bharaṃtaṃ vīkṣaṃtaṃ ghūrṇayaṃtaṃ śaranikaraśatairdivyasiṃhaṃ namāmi || 31 || iti śrībrahmāṃḍapurāṇē prahlādōktaṃ śrī nṛsiṃha kavacam |

నృసింహకవచం వక్ష్యే ప్రహ్లాదేనోదితం పురా | సర్వరక్షాకరం పుణ్యం సర్వోపద్రవనాశనమ్ || ౧ || సర్వసంపత్కరం చైవ స్వర్గమోక్షప్రదాయకమ్ | ధ్యాత్వా నృసింహం దేవేశం హేమసింహాసనస్థితమ్ || ౨ || వివృతాస్యం త్రినయనం శరదిందుసమప్రభమ్ | లక్ష్మ్యాలింగితవామాంగం విభూతిభిరుపాశ్రితమ్ || ౩ || చతుర్భుజం కోమలాంగం స్వర్ణకుండలశోభితమ్ | సరోజశోభితోరస్కం రత్నకేయూరముద్రితమ్ || ౪ || తప్తకాంచనసంకాశం పీతనిర్మలవాససమ్ | ఇంద్రాదిసురమౌళిస్థస్ఫురన్మాణిక్యదీప్తిభిః || ౫ || విరాజితపదద్వంద్వం శంఖచక్రాదిహేతిభిః | గరుత్మతా సవినయం స్తూయమానం ముదాన్వితమ్ || ౬ || స్వహృత్కమలసంవాసం కృత్వా తు కవచం పఠేత్ | నృసింహో మే శిరః పాతు లోకరక్షాత్మసంభవః || ౭ || సర్వగోఽపి స్తంభవాసః ఫాలం మే రక్షతు ధ్వనిమ్ | నృసింహో మే దృశౌ పాతు సోమసూర్యాగ్నిలోచనః || ౮ || స్మృతిం మే పాతు నృహరిర్మునివర్యస్తుతిప్రియః | నాసాం మే సింహనాసస్తు ముఖం లక్ష్మీముఖప్రియః || ౯ || సర్వవిద్యాధిపః పాతు నృసింహో రసనాం మమ | వక్త్రం పాత్విందువదనః సదా ప్రహ్లాదవందితః || ౧౦ || నృసింహః పాతు మే కంఠం స్కంధౌ భూభరణాంతకృత్ | దివ్యాస్త్రశోభితభుజో నృసింహః పాతు మే భుజౌ || ౧౧ || కరౌ మే దేవవరదో నృసింహః పాతు సర్వతః | హృదయం యోగిసాధ్యశ్చ నివాసం పాతు మే హరిః || ౧౨ || మధ్యం పాతు హిరణ్యాక్షవక్షఃకుక్షివిదారణః | నాభిం మే పాతు నృహరిః స్వనాభిబ్రహ్మసంస్తుతః || ౧౩ || బ్రహ్మాండకోటయః కట్యాం యస్యాసౌ పాతు మే కటిమ్ | గుహ్యం మే పాతు గుహ్యానాం మంత్రాణాం గుహ్యరూపధృక్ || ౧౪ || ఊరూ మనోభవః పాతు జానునీ నరరూపధృక్ | జంఘే పాతు ధరాభారహర్తా యోఽసౌ నృకేసరీ || ౧౫ || సురరాజ్యప్రదః పాతు పాదౌ మే నృహరీశ్వరః | సహస్రశీర్షా పురుషః పాతు మే సర్వశస్తనుమ్ || ౧౬ || మహోగ్రః పూర్వతః పాతు మహావీరాగ్రజోఽగ్నితః | మహావిష్ణుర్దక్షిణే తు మహాజ్వాలస్తు నైరృతౌ || ౧౭ || పశ్చిమే పాతు సర్వేశో దిశి మే సర్వతోముఖః | నృసింహః పాతు వాయవ్యాం సౌమ్యాం భూషణవిగ్రహః || ౧౮ || ఈశాన్యాం పాతు భద్రో మే సర్వమంగళదాయకః | సంసారభయదః పాతు మృత్యోర్మృత్యుర్నృకేసరీ || ౧౯ || ఇదం నృసింహకవచం ప్రహ్లాదముఖమండితమ్ | భక్తిమాన్యః పఠేన్నిత్యం సర్వపాపైః ప్రముచ్యతే || ౨౦ || పుత్రవాన్ ధనవాన్ లోకే దీర్ఘాయురుపజాయతే | యం యం కామయతే కామం తం తం ప్రాప్నోత్యసంశయమ్ || ౨౧ || సర్వత్ర జయమాప్నోతి సర్వత్ర విజయీ భవేత్ | భూమ్యంతరిక్షదివ్యానాం గ్రహాణాం వినివారణమ్ || ౨౨ || వృశ్చికోరగసంభూతవిషాపహరణం పరమ్ | బ్రహ్మరాక్షసయక్షాణాం దూరోత్సారణకారణమ్ || ౨౩ || భూర్జే వా తాళపత్రే వా కవచం లిఖితం శుభమ్ | కరమూలే ధృతం యేన సిధ్యేయుః కర్మసిద్ధయః || ౨౪ || దేవాసురమనుష్యేషు స్వం స్వమేవ జయం లభేత్ | ఏకసంధ్యం త్రిసంధ్యం వా యః పఠేన్నియతో నరః || ౨౫ || సర్వమంగళమాంగళ్యం భుక్తిం ముక్తిం చ విందతి | ద్వాత్రింశచ్చ సహస్రాణి పఠేచ్ఛుద్ధాత్మనాం నృణామ్ || ౨౬ || కవచస్యాస్య మంత్రస్య మంత్రసిద్ధిః ప్రజాయతే | అనేన మంత్రరాజేన కృత్వా భస్మాభిమంత్రణమ్ || ౨౭ || తిలకం విన్యసేద్యస్తు తస్య గ్రహభయం హరేత్ | త్రివారం జపమానస్తు దత్తం వార్యభిమంత్ర్య చ || ౨౮ || ప్రాశయేద్యో నరో మంత్రం నృసింహధ్యానమాచరేత్ | తస్య రోగాః ప్రణశ్యంతి యే చ స్యుః కుక్షిసంభవాః || ౨౯ || కిమత్ర బహునోక్తేన నృసింహసదృశో భవేత్ | మనసా చింతితం యత్తు స తచ్చాప్నోత్యసంశయమ్ || ౩౦ || గర్జంతం గర్జయంతం నిజభుజపటలం స్ఫోటయంతం హటంతం రూప్యంతం తాపయంతం దివి భువి దితిజం క్షేపయంతం క్షిపంతమ్ | క్రందంతం రోషయంతం దిశి దిశి సతతం సంహరంతం భరంతం వీక్షంతం ఘూర్ణయంతం శరనికరశతైర్దివ్యసింహం నమామి || ౩౧ || ఇతి శ్రీబ్రహ్మాండపురాణే ప్రహ్లాదోక్తం శ్రీ నృసింహ కవచమ్ |