ಶ್ರೀ ದಕ್ಷಿಣಾಮೂರ್ತಿ ಸ್ತೋತ್ರಂ – ೧

ಉಪಾಸಕಾನಾಂ ಯದುಪಾಸನೀಯ- -ಮುಪಾತ್ತವಾಸಂ ವಟಶಾಖಿಮೂಲೇ | ತದ್ಧಾಮ ದಾಕ್ಷಿಣ್ಯಜುಷಾ ಸ್ವಮೂರ್ತ್ಯಾ ಜಾಗರ್ತು ಚಿತ್ತೇ ಮಮ ಬೋಧರೂಪಮ್ || ೧ || ಅದ್ರಾಕ್ಷಮಕ್ಷೀಣದಯಾನಿಧಾನ- -ಮಾಚಾರ್ಯಮಾದ್ಯಂ ವಟಮೂಲಭಾಗೇ | ಮೌನೇನ ಮಂದಸ್ಮಿತಭೂಷಿತೇನ ಮಹರ್ಷಿಲೋಕಸ್ಯ ತಮೋ ನುದಂತಮ್ || ೨ || ವಿದ್ರಾವಿತಾಶೇಷತಮೋಗಣೇನ ಮುದ್ರಾವಿಶೇಷೇಣ ಮುಹುರ್ಮುನೀನಾಮ್ | ನಿರಸ್ಯ ಮಾಯಾಂ ದಯಯಾ ವಿಧತ್ತೇ ದೇವೋ ಮಹಾಂಸ್ತತ್ತ್ವಮಸೀತಿ ಬೋಧಮ್ || ೩ || ಅಪಾರಕಾರುಣ್ಯಸುಧಾತರಂಗೈ- -ರಪಾಂಗಪಾತೈರವಲೋಕಯಂತಮ್ | ಕಠೋರಸಂಸಾರನಿದಾಘತಪ್ತಾನ್ ಮುನೀನಹಂ ನೌಮಿ ಗುರುಂ ಗುರೂಣಾಮ್ || ೪ || ಮಮಾದ್ಯದೇವೋ ವಟಮೂಲವಾಸೀ ಕೃಪಾವಿಶೇಷಾತ್ಕೃತಸನ್ನಿಧಾನಃ | ಓಂಕಾರರೂಪಾಮುಪದಿಶ್ಯ ವಿದ್ಯಾ- -ಮಾವಿದ್ಯಕಧ್ವಾಂತಮಪಾಕರೋತು || ೫ || ಕಲಾಭಿರಿಂದೋರಿವ ಕಲ್ಪಿತಾಂಗಂ ಮುಕ್ತಾಕಲಾಪೈರಿವ ಬದ್ಧಮೂರ್ತಿಮ್ | ಆಲೋಕಯೇ ದೇಶಿಕಮಪ್ರಮೇಯ- -ಮನಾದ್ಯವಿದ್ಯಾತಿಮಿರಪ್ರಭಾತಮ್ || ೬ || ಸ್ವದಕ್ಷಜಾನುಸ್ಥಿತವಾಮಪಾದಂ ಪಾದೋದರಾಲಂಕೃತಯೋಗಪಟ್ಟಮ್ | ಅಪಸ್ಮೃತೇರಾಹಿತಪಾದಮಂಗೇ ಪ್ರಣೌಮಿ ದೇವಂ ಪ್ರಣಿಧಾನವಂತಮ್ || ೭ || ತತ್ತ್ವಾರ್ಥಮಂತೇ ವಸತಾಮೃಷೀಣಾಂ ಯುವಾಽಪಿ ಯಃ ಸನ್ನುಪದೇಷ್ಟುಮೀಷ್ಟೇ | ಪ್ರಣೌಮಿ ತಂ ಪ್ರಾಕ್ತನಪುಣ್ಯಜಾಲೈ- -ರಾಚಾರ್ಯಮಾಶ್ಚರ್ಯಗುಣಾಧಿವಾಸಮ್ || ೮ || ಏಕೇನ ಮುದ್ರಾಂ ಪರಶುಂ ಕರೇಣ ಕರೇಣ ಚಾನ್ಯೇನ ಮೃಗಂ ದಧಾನಃ | ಸ್ವಜಾನುವಿನ್ಯಸ್ತಕರಃ ಪುರಸ್ತಾ- -ದಾಚಾರ್ಯಚೂಡಾಮಣಿರಾವಿರಸ್ತು || ೯ || ಆಲೇಪವಂತಂ ಮದನಾಂಗಭೂತ್ಯಾ ಶಾರ್ದೂಲಕೃತ್ತ್ಯಾ ಪರಿಧಾನವಂತಮ್ | ಆಲೋಕಯೇ ಕಂಚನ ದೇಶಿಕೇಂದ್ರ- -ಮಜ್ಞಾನವಾರಾಕರವಾಡವಾಗ್ನಿಮ್ || ೧೦ || ಚಾರುಸ್ಮಿತಂ ಸೋಮಕಳಾವತಂಸಂ ವೀಣಾಧರಂ ವ್ಯಕ್ತಜಟಾಕಲಾಪಮ್ | ಉಪಾಸತೇ ಕೇಚನ ಯೋಗಿನಸ್ತ್ವಾ- -ಮುಪಾತ್ತನಾದಾನುಭವಪ್ರಮೋದಮ್ || ೧೧ || ಉಪಾಸತೇ ಯಂ ಮುನಯಃ ಶುಕಾದ್ಯಾ ನಿರಾಶಿಷೋ ನಿರ್ಮಮತಾಧಿವಾಸಾಃ | ತಂ ದಕ್ಷಿಣಾಮೂರ್ತಿತನುಂ ಮಹೇಶ- -ಮುಪಾಸ್ಮಹೇ ಮೋಹಮಹಾರ್ತಿಶಾಂತ್ಯೈ || ೧೨ || ಕಾಂತ್ಯಾ ನಿಂದಿತಕುಂದಕಂದಲವಪುರ್ನ್ಯಗ್ರೋಧಮೂಲೇ ವಸನ್ ಕಾರುಣ್ಯಾಮೃತವಾರಿಭಿರ್ಮುನಿಜನಂ ಸಂಭಾವಯನ್ವೀಕ್ಷಿತೈಃ | ಮೋಹಧ್ವಾಂತವಿಭೇದನಂ ವಿರಚಯನ್ ಬೋಧೇನ ತತ್ತಾದೃಶಾ ದೇವಸ್ತತ್ತ್ವಮಸೀತಿ ಬೋಧಯತು ಮಾಂ ಮುದ್ರಾವತಾ ಪಾಣಿನಾ || ೧೩ || ಅಗೌರಗಾತ್ರೈರಲಲಾಟನೇತ್ರೈ- -ರಶಾಂತವೇಷೈರಭುಜಂಗಭೂಷೈಃ | ಅಬೋಧಮುದ್ರೈರನಪಾಸ್ತನಿದ್ರೈ- -ರಪೂರ್ಣಕಾಮೈರಮರೈರಲಂ ನಃ || ೧೪ || ದೈವತಾನಿ ಕತಿ ಸಂತಿ ಚಾವನೌ ನೈವ ತಾನಿ ಮನಸೋ ಮತಾನಿ ಮೇ | ದೀಕ್ಷಿತಂ ಜಡಧಿಯಾಮನುಗ್ರಹೇ ದಕ್ಷಿಣಾಭಿಮುಖಮೇವ ದೈವತಮ್ || ೧೫ || ಮುದಿತಾಯ ಮುಗ್ಧಶಶಿನಾವತಂಸಿನೇ ಭಸಿತಾವಲೇಪರಮಣೀಯಮೂರ್ತಯೇ | ಜಗದಿಂದ್ರಜಾಲರಚನಾಪಟೀಯಸೇ ಮಹಸೇ ನಮೋಽಸ್ತು ವಟಮೂಲವಾಸಿನೇ || ೧೬ || ವ್ಯಾಲಂಬಿನೀಭಿಃ ಪರಿತೋ ಜಟಾಭಿಃ ಕಳಾವಶೇಷೇಣ ಕಳಾಧರೇಣ | ಪಶ್ಯಲ್ಲಲಾಟೇನ ಮುಖೇಂದುನಾ ಚ ಪ್ರಕಾಶಸೇ ಚೇತಸಿ ನಿರ್ಮಲಾನಾಮ್ || ೧೭ || ಉಪಾಸಕಾನಾಂ ತ್ವಮುಮಾಸಹಾಯಃ ಪೂರ್ಣೇಂದುಭಾವಂ ಪ್ರಕಟೀಕರೋಷಿ | ಯದದ್ಯ ತೇ ದರ್ಶನಮಾತ್ರತೋ ಮೇ ದ್ರವತ್ಯಹೋ ಮಾನಸಚಂದ್ರಕಾಂತಃ || ೧೮ || ಯಸ್ತೇ ಪ್ರಸನ್ನಾಮನುಸಂದಧಾನೋ ಮೂರ್ತಿಂ ಮುದಾ ಮುಗ್ಧಶಶಾಂಕಮೌಳೇಃ | ಐಶ್ವರ್ಯಮಾಯುರ್ಲಭತೇ ಚ ವಿದ್ಯಾ- -ಮಂತೇ ಚ ವೇದಾಂತಮಹಾರಹಸ್ಯಮ್ || ೧೯ || ಇತಿ ಶ್ರೀಮಚ್ಛಂಕರಾಚಾರ್ಯ ಕೃತ ಶ್ರೀ ದಕ್ಷಿಣಾಮೂರ್ತಿ ಸ್ತೋತ್ರಮ್ |