ಷಡಕ್ಷರಾಷ್ಟೋತ್ತರಶತನಾಮ ಸ್ತೋತ್ರಂ

ಶರಣ್ಯಃ ಶರ್ವತನಯಃ ಶರ್ವಾಣೀಪ್ರಿಯನಂದನಃ | ಶರಕಾನನಸಂಭೂತಃ ಶರ್ವರೀಶಮುಖಃ ಶಮಃ || ೧ || ಶಂಕರಃ ಶರಣತ್ರಾತಾ ಶಶಾಂಕಮುಕುಟೋಜ್ಜ್ವಲಃ | ಶರ್ಮದಃ ಶಂಖಕಂಠಶ್ಚ ಶರಕಾರ್ಮುಕಹೇತಿಭೃತ್ || ೨ || ಶಕ್ತಿಧಾರೀ ಶಕ್ತಿಕರಃ ಶತಕೋಟ್ಯರ್ಕಪಾಟಲಃ | ಶಮದಃ ಶತರುದ್ರಸ್ಥಃ ಶತಮನ್ಮಥವಿಗ್ರಹಃ || ೩ || ರಣಾಗ್ರಣೀ ರಕ್ಷಣಕೃದ್ರಕ್ಷೋಬಲವಿಮರ್ದನಃ | ರಹಸ್ಯಜ್ಞೋ ರತಿಕರೋ ರಕ್ತಚಂದನಲೇಪನಃ || ೪ || ರತ್ನಧಾರೀ ರತ್ನಭೂಷೋ ರತ್ನಕುಂಡಲಮಂಡಿತಃ | ರಕ್ತಾಂಬರೋ ರಮ್ಯಮುಖೋ ರವಿಚಂದ್ರಾಗ್ನಿಲೋಚನಃ || ೫ || ರಮಾಕಲತ್ರಜಾಮಾತಾ ರಹಸ್ಯೋ ರಘುಪೂಜಿತಃ | ರಸಕೋಣಾಂತರಾಲಸ್ಥೋ ರಜೋಮೂರ್ತೀ ರತಿಪ್ರದಃ || ೬ || ವಸುದೋ ವಟುರೂಪಶ್ಚ ವಸಂತಋತುಪೂಜಿತಃ | ವಲವೈರಿಸುತಾನಾಥೋ ವನಜಾಕ್ಷೋ ವರಾಕೃತಿಃ || ೭ || ವಕ್ರತುಂಡಾನುಜೋ ವತ್ಸೋ ವರದಾಭಯಹಸ್ತಕಃ | ವತ್ಸಲೋ ವರ್ಷಕಾರಶ್ಚ ವಸಿಷ್ಠಾದಿಪ್ರಪೂಜಿತಃ || ೮ || ವಣಿಗ್ರೂಪೋ ವರೇಣ್ಯಶ್ಚ ವರ್ಣಾಶ್ರಮವಿಧಾಯಕಃ | ವರದೋ ವಜ್ರಭೃದ್ವಂದ್ಯೋ ವಂದಾರುಜನವತ್ಸಲಃ || ೯ || ನಕಾರರೂಪೋ ನಲಿನೋ ನಕಾರಯುತಮಂತ್ರಕಃ | ನಕಾರವರ್ಣನಿಲಯೋ ನಂದನೋ ನಂದಿವಂದಿತಃ || ೧೦ || ನಟೇಶಪುತ್ರೋ ನಮ್ರಭ್ರೂರ್ನಕ್ಷತ್ರಗ್ರಹನಾಯಕಃ | ನಗಾಗ್ರನಿಲಯೋ ನಮ್ಯೋ ನಮದ್ಭಕ್ತಫಲಪ್ರದಃ || ೧೧ || ನವನಾಗೋ ನಗಹರೋ ನವಗ್ರಹಸುವಂದಿತಃ | ನವವೀರಾಗ್ರಜೋ ನವ್ಯೋ ನಮಸ್ಕಾರಸ್ತುತಿಪ್ರಿಯಃ || ೧೨ || ಭದ್ರಪ್ರದಶ್ಚ ಭಗವಾನ್ ಭವಾರಣ್ಯದವಾನಲಃ | ಭವೋದ್ಭವೋ ಭದ್ರಮೂರ್ತಿರ್ಭರ್ತ್ಸಿತಾಸುರಮಂಡಲಃ || ೧೩ || ಭಯಾಪಹೋ ಭರ್ಗರೂಪೋ ಭಕ್ತಾಭೀಷ್ಟಫಲಪ್ರದಃ | ಭಕ್ತಿಗಮ್ಯೋ ಭಕ್ತನಿಧಿರ್ಭಯಕ್ಲೇಶವಿಮೋಚನಃ || ೧೪ || ಭರತಾಗಮಸುಪ್ರೀತೋ ಭಕ್ತೋ ಭಕ್ತಾರ್ತಿಭಂಜನಃ | ಭಯಕೃದ್ಭರತಾರಾಧ್ಯೋ ಭರದ್ವಾಜಋಷಿಸ್ತುತಃ || ೧೫ || ವರುಣೋ ವರುಣಾರಾಧ್ಯೋ ವಲಾರಾತಿಮುಖಸ್ತುತಃ | ವಜ್ರಶಕ್ತ್ಯಾಯುಧೋಪೇತೋ ವರೋ ವಕ್ಷಃಸ್ಥಲೋಜ್ಜ್ವಲಃ || ೧೬ || ವಸ್ತುರೂಪೋ ವಶಿಧ್ಯೇಯೋ ವಲಿತ್ರಯವಿರಾಜಿತಃ | ವಕ್ರಾಲಕೋ ವಲಯಧೃತ್ ವಲತ್ಪೀತಾಂಬರೋಜ್ಜ್ವಲಃ || ೧೭ || ವಚೋರೂಪೋ ವಚನದೋ ವಚೋಽತೀತಚರಿತ್ರಕಃ | ವರದೋ ವಶ್ಯಫಲದೋ ವಲ್ಲೀದೇವೀಮನೋಹರಃ || ೧೮ || ಇತಿ ಶ್ರೀಸುಬ್ರಹ್ಮಣ್ಯ ಷಡಕ್ಷರಾಷ್ಟೋತ್ತರಶತನಾಮಸ್ತೋತ್ರಮ್ |